ጥር 8፤2016 – ኢራን በፓኪስታን የሚገኙ ታጣቂዎች ላይ ኢላማ ያደረገ ጥቃት ፈጸመች

 

ኢራን በምእራብ ፓኪስታን የሚገኘውን ታጣቂ ቡድን መምታቷን አስታዉቃለች፣ይህም ባለፈው ሳምንት ኢራን በኢራቅ እና ሶሪያ ላይ ጥቃት ከተሰነዘረች በኋላ የአሁኑ ሶስተኛው የአየር ጥቃት ነው።የኢራን መንግስት ቲቪ እንዳስታወቀው ድርጊቱ በባሎቺስታን በሚገኘዉ ታጣቂው ጃኢሽ አል-አድል ጋር የተገናኙ ሁለት ቦታዎች ላይ ኢላማ ያደረገ ነዉ፡፡

የፓኪስታን ባለስልጣናት ሁለት ህጻናት ሲገደሉ ሌሎች ሶስት ደግሞ ቆስለዋል።ኢስላማባድ የአየር ድብደባው “ህገወጥ ድርጊት” መሆኑን ገልጾ “ከባድ መዘዞችን” ሊያስከትል እንደሚችል አስጠንቅቋል::ይህዉ ጥቃት ከ100 ቀናት በላይ ታይቶ በማይታወቅ ሁኔታ በእስራኤል እና በፍልስጤም ቡድን ሃማስ መካከል የዘለቀዉ ግጭት የወለደዉ ነዉ፡፡ ዩናይትድ ስቴትስና ዩናይትድ ኪንግደም በኢራን በሚደገፉት የየመን የሁቲ ታጣቂዎች በቀይ ባህር ውስጥ የንግድ መርከቦችን ማጥቃት መጀመራቸዉን ተከትሎ ግጭቱ ተስፋፍቷል።

በፓኪስታን ኢራን የፈጸመችዉ ጥቃት በሰፊው ደቡብ ምዕራብ ባሎቺስታን ድንበር ግዛት ውስጥ ያለች መንደርን መቷል።ሰኞ ረፋድ ላይ ኢራን በሰሜናዊ ኢራቅ ኢርቢል ከተማ የባሊስቲክ ሚሳኤሎችን በመተኮሷ በአሜሪካ ውግዘት አስከትሎባታል።የኢራን አብዮታዊ ጥበቃዎች የኢራቅ ከፊል ራስ ገዝ በሆነው የኩርዲስታን ክልል የእስራኤል “የስለላ ዋና መሥሪያ ቤት” ናቸው ያላቸውን ስፍራዎች መምታቱን አስታዉቋል።

ኢራን በሶሪያ ሰሜናዊ ምዕራብ ኢድሊብ ግዛት ኢላማዎችን በመምታቱ ከሶሪያ መንግስት ቁጥጥር ውጪ በሆነዉና በሀገሪቱ የተቃዋሚዎች ምሽግ ነዉ በተባለ ስፍራ ጥቃት አድርሳለች፡፡በግዛቷ ላይ የተፈጸመውን ጥቃት ተከትሎ ፓኪስታን “ኢራን የአየር ክልሌን ያለምክንያት ጥሳለች” ስትል ከሳለች፡፡

በስምኦን ደረጄ

photo_2024-01-17_14-05-36

ጥር 8፤2016 – የግብረ-ስጋ ግንኙነት እንዲፈፅሙ ጠይቋት ፈቃደኛ ባለመሆኗ ሟችን በቢላዋ  ወግቶ የገደለው ተከሳሽ በ23 ዓመት ፅኑ እስራት ተቀጣ

 

ዳንኤል በርሄ ስዩም የተባለ ተከሳሽ ሀምሌ 15 ቀን 2014 ዓ.ም ከጠዋቱ በግምት 3፡30 ሲሆን በአቃቂ ቃሊቲ ክፍለ ከተማ ወረዳ 06 ሳሪስ አደይ አበባ መኪና መሻገሪያ ድልድይ አካባቢ በሚገኘው ፍሬሕይወት ህንፃ ውስጥ ሟችን የሽንት ቤት ቁልፍ ክፈችልኝ ብሏት ስትከፍትለት የግብረ-ስጋ ግንኙነት እንዲፈፅሙ ጠይቋት ፈቃደኛ ባለመሆንዋ አንገትዋን በቢላ በመውጋት ሕይወትዋ እንዲያልፍ አድርጓል፡፡

በዚህም ምክንያት በአዲስ አበባ ፖሊስ ኮሚሽን ምርመራ ተጣርቶ በሴቶችና ህጻናት ላይ የሚፈፀሙ ወንጀሎች ዐቃቤ ሕግ ዳይሬክቶሬት በወ/ሕ/አ 539/1/ሀ መሰረት በፌዴራል ከፍተኛ ፍ/ቤት ልደታ ምድብ 1ኛ የሰው ግድያና ከባድ ውንብድና ወንጀል ችሎት ክስ ቀርቦበት ክርክር ሲደረግ መቆየቱን ብስራት ራዲዮና ቴሌቪዥን ከፍትህ ሚኒስቴር ያገኘዉ መረጃ ያመላክታል፡፡

በክርክሩ ሂደትም የዐቃቤ ሕግ ማስረጃ ከተሰማ በኋላ ተከሳሽ እንዲከላከል ብይን ተሰጥቶ ተከሳሽ የመከላከያ ምስክሮች በማስረጃነት አቅርቦ ያሰማ ቢሆንም በዐቃቤ ሕግ የቀረበበትን ክስ መከላከል ባለመቻሉ ምክንያት ፍርድ ቤቱ በተከሳሽ ላይ የጥፋተኛነት ፍርድ በመስጠት ተከሳሽ በ23 ዓመት ፅኑ እስራት እንዲቀጣ ሲል ወስኗል፡፡

ጥር 8፤2016 – ቻይና ለተከታታይ ሁለተኛ አመት የህዝብ ቁጥሯ ቀነሰ

 

ቻይና የህዝብ ቁጥሯ ታይቶ በማይታወቅ መልኩ ለተከታታይ ሁለት አመታት መቀነስ ማሳየቱን የቻይና ብሔራዊ የስታትስቲክስ ቢሮ አስታዉቋል።

ቻይና በ 2022 አመት ከስልሳ አመታት በኋላ ለመጀመሪያ ጊዜ የህዝብ ቁጥሯ ቀንሶ በአለም ከፍተኛ የህዝብ ቁጥር ያለባት የሚለዉን ቅጽያ ወደ ህንድ ማዘዋወሯ ይታወሳል። በ 2022 አመትም በ 2.8 ሚሊዮን የቻይና የህዝብ ቁጥር ቀንሶ ወደ 1.411 ቢሊዮን ወርዶ ነበር።

በ 2023 አመትም በቻይና ወደዚህች ምድር ከተቀላቀሉት የዉልደት መጠን ይልቅ በአመቱ የተመዘገበዉ ሞት እንደሚበልጥ ተዘግቧል። ይህም የህዝብ ቆጠራ ከተጀመረበት 1949 ወዲህ በቻይና የተመዘገበው ዝቅተኛ የዉልደት መጠን መሆኑ ተነግሯል።

በተጠናቀቀው የፈረንጆቹ አመትም የዉልደት መጠኑ ከ 1 ሺህ ሰዎች 6.39 ህጻናት ይገኛሉ የሚል ነዉ። በባለፈዉም አመት በቻይና 9.02 ሚሊዮን ህጻናት ሲወለዱ በቀዳሚዉ አመት ከተመዘገበው 9.56 ሚሊዮን ህጻናት ቁጥር ያነሰ ነዉ ።

በበረከት ሞገስ

photo_2024-01-17_10-14-52

ጥር 8፤2016 – የሶማሊያ ፕሬዝዳንት ልጅ በቱርክ በትራፊክ አደጋ ምክንያት ሰው በመግደሉ ቅጣት ተጣለበት

 

የሶማሊያው ፕሬዝዳንት ልጅ በቱርክ ውስጥ መኪናውን ሲያሽከረክር ከሞተር ሳይክል መልእክተኛ ጋር በመጋጨቱ እና ተጎጂው ከቀናት በኃላ ህይወቱ በማለፉ 900 ዶላር ተቀጥቷል ። የኢስታንቡል ፍርድ ቤት ባለፈው ማክሰኞ መሀመድ ሀሰን ሼክ መሀሙድን በቸልተኝነት አደጋ በማድረስ ለተፈጠረው የሞት ምክንያት ጥፋተኛ ብሎታል። ያሽከረክረው የነበረው መኪና በህዳር ወር ላይ የሞተር ሳይክል አሽከርካሪውን ዩኑስ ኤምሬ ጎሰርን ገጭቷል።

የተጎጂው ጎሰር ጉዳት የተከታተሉ ሰዎች ቅጣቱ በጣም ቀላል ነው ሲሉ ቅሬታቸውን ገልጸዋል እናም ፍትህ አልተሰጠም ሲሉ ተደምጠዋል። የፕሬዝዳንቱ ልጅ መሐሙድ በታኅሣሥ ወር ከቱርክ መውጣቱ የፖሊስ ምርመራ በተቃዋሚዎች ዘንድ ከፍተኛ ቅሬታ አስነስቷል ሲል አጃንስ ፍራንስ ፕሬስ የዜና ወኪል ዘግቧል። የቱርክ ፖሊስ ተቺዎች የሶማሊያው ፕሬዝዳንት ሀሰን ሼክ መሀሙድ ልጅ መሀሙድ ከሀገር እንዲወጠ ባለስልጣናቱ ፈቅደውላቸዋል ብለዋል።

ቱርክ መሀሙድ ላይ አለም አቀፍ የእስር ማዘዣ አውጥቶ ለፍርድ ከመቅረቡ በፊት በገዛ ፍቃዱ ወደ ቱርክ ተመልሷል። ፍርድ ቤቱ መጀመሪያ ላይ የሁለት አመት ተኩል እስራት ቢፈረድበትም ይህን ውሳኔ ወደ ገንዘብ ቅጣት ተቀይሮታል።በችሎቱ ወቅት ያሳየው ፀፀት ለፍርዱ መቀነስ ምክንያት ነው የተባለ ሲሆን ለስድስት ወራት ያህል መኪና እንዳያሽከረክርም ተከልክሏል።

አቃቤ ህግ ግን የስድስት አመት እስራት እንዲጣልበት ጠይቆ ነበር። የሞተር ሳይክል ተላላኪ ህይወት 27,000 ሊራ ወይም 900 ዶላር ብቻ ሊሆን አይችልም፤ ይህ ፍትህ ነው ወይ? ሲሉ የኩሪየር መብቶች ማህበር ፕሬዝዳንት ሜሱት ቄኪ ከፍርድ ቤቱ በራፍ ላይ በሰጡት መግለጫ ተናግረዋል።

ባለፈው ወር፣ በተፈጠረው የህዝብ ቁጣ እየበረታ ሲሄድ፣ የኢስታንቡል ከንቲባ ኤክሬም ኢማሞግሉ በህዳር 30 ስለተፈጠረው ክስተት የሲሲቲቪ ምስል በኤክስ ገፅ ላይ አጋርተዋል። በተሽከርካሪ በተጨናነቀ መንገድ መጋጠጠሚያ ላይ አንድ ሞተር ሳይክል ከጀርባው በመኪና ሲመታ ይታያል። ተጎጂው የሁለት ልጆች አባት የ38 አመቱ ጎከር ወደ ሆስፒታል ቢወሰድም ህይወቱ ግን ማትረፍ ሳይቻል ከስድስት ቀናት በኃላ መሞቱ ተሰምቷል።የመጀመርያው የፖሊስ ዘገባ ላይ ጎከር ጥፋተኛ እንደነበር እና በዚህም ምክንያት መሀሙድ እንደተፈታ ገልጿል። ነገር ግን ጫናው ሲበረታበት ፖሊስ ቃሉን ቀይሯል።

በስምኦን ደረጄ

ጥር 8፤2016 – በቡታጅራ ከተማ በተሽከርካሪ የታገዘ ስርቆት ሲፈፅሙ የተገኙ 27 ተጠርጣሪዎች በቁጥጥር ስር መዋላቸው ተነገረ

 

በማዕከላዊ ኢትዮጵያ ክልል በጉራጌ ዞን በቡታጅራ ከተማ አስተዳደር ህገ-ወጥ እንቅስቃሴን ለመከላከልና ለመቆጣጠር በተደረገ ስምሪት በዘረፋ ወንጀል የተሰማሩ 27 ተጠርጣሪዎች በቁጥጥር ስር መዋላቸው ተነግሯል ።

ከተጠርጣሪዎቹ መካከል 17 ግለሰቦች ጥር 3 ቀን 2016 ዓ.ም ለስርቆት ሲንቀሳቀሱባቸው ከነበሩ 8 ባለ ሶስት እግር ባጃጅ ተሽከርካሪ እና አንድ ሞተር ሳይክል ጋር እንደተያዙ የክልሉ ፖሊስ ኮሚሽን የሚዲያ ክፍል ሃላፊ ምክትል ኮማንደር ታጁ ነጋሽ ለብስራት ራዲዮና ቴሌቪዥን ተናግረዋል  ።

ሌሎች 10 ተጠርጣሪዎች ቀደም ሲል የተያዙ ሲሆን ምርመራ ተጣርቶ ክስ እንደተመሠረተባቸው አክለዋል ። በቁጥጥር ስር ከዋሉት ውስጥ ከሌሎች አካባቢዎች ወደ ከተማዋ የገቡ ግለሰቦች ይገኙበታል ተብሏል ።

ማህበረሰቡ በግብይት ፣ በንግድና በሌሎች እንቅስቃሴዎች ላይ ስልክ ገንዘብና ሌሎች ንብረቶችን በጥንቃቄ እንዲይዝ እና ጥንቃቄ እንዲያደርግ አሳስበዋል።

በአበረ ስሜነህ

photo_2024-01-16_09-59-07

ጥር 7፤2016 – የኬንያ ዋና ዳኛ ፕሬዝዳንት ሩቶ በዳኞች ላይ በሰነዘሩት ዛቻ ዙሪያ መነጋገር እንደሚፈልጉ አስታወቁ

 

የኬንያ ዋና ዳኛ ማርታ ኩሜ እንዳሉት በአንዳንድ ዳኞች ላይ ፕሬዝዳንቱ የፈጠሩትን ስጋት ለመፍታት እንዲቻል የፍትህ አካላት ለፕሬዚዳንት ዊሊያም ሩቶ ደብዳቤ ፅፈዋል። ፕሬዝዳንት ሩቶ ከቅርብ ቀናት ወዲህ በፍትህ አካላት ላይ ጦርነት ከፍተዋል አንዳንድ ስማቸውን ያልገለጿቸውን ዳኞች  “ሙሰኞች” በማለት የመንግስታቸውን ፕሮጀክቶች ከተቃዋሚዎች ጋር በማበር እያሰናከሉ ነው ሲሉ ከሰዋል።

ኩሜ ሰኞ እለት በተካሄደው የሚዲያ ማብራሪያ ላይ እንደተናገሩት በፍትህ አካላት ላይ የሚሰነዘሩት ጥቃቶች ሀገሪቱን ለሁከትና ብጥብጥ እየዳረገ ነው ብለዋል። እንዲህ ዓይነት ጥቃይ ያለማቋረጥ እንዲቀጥል ከፈቀድን ወደ ማይታወቅ የእርስ በርስ ግጭት ሊመራ ወደሚችል እና ህገ-መንግስታዊ ቀውስ ላይ ያደርቀናል ሲሉ ወይዘሮ ኩሜ አክለዋል። “ስለዚህ ይህንን ውይይት ከፕሬዝዳንቱ እንጠብቃለን ፣ እንዲደረግም ውይይቱ ደብዳቤ ጽፈናል እናም ፕሬዚዳንቱ ቀጠሮ ይሰጡናል ብዬ አምናለሁ” ብለዋል ።

የተቃዋሚው መሪ ራይላ ኦዲንጋ ፕሬዝዳንት ሩቶ በማውገዝ በተደረገው የተቃውሞ ሰልፍ ላይ ባደረጉት ንግግር ዳኞችን ለማስፈራራት ሞክረዋል ሲሉ መክሰሳቸው ይታወሳል። እ.ኤ.አ በመስከረም 2022 ወደ ስልጣን የመጡት ፕሬዚዳንቱ በኑሮ ውድነት ላይ አዳዲስ ቀረጥ በማውጣታቸው ወቀሳ ደርሶባቸዋል። ሁለት አዳዲስ ታክሶች ማለትም የመኖሪያ ቤት ቀረጥ እና ሁለንተናዊ የጤና ሽፋን ቅነሳዎች ሲሆኑ ይህም በፍርድ ቤት ክስ እንዲመሰረትባቸው ሆኗል።

በአበረ ስሜነህ

ጥር 6፤2016 – የዓለማችን አምስት ቱጃር ሰዎች ከ2020 ወዲህ ያላቸውን  ሀብት በእጥፍ አሳድገዋል ተባለ

 

የዓለማችን አምስቱ ቱጃሮች ከ2020 ወዲህ ሀብታቸው በእጥፍ መጨመሩ በዳቮስ፣ ስዊዘርላንድ በተካሄደው አመታዊ ስብሰባ ላይ ኦክስፋም የተሰኘው ግብረሰናይ ድርጅት አስታውቋል።

አምስቱ ሰዎች ባለፉት አራት ዓመታት በሰዓት 14 ሚሊዮን ዶላር ሀብታቸውን ያሳደጉ ሲሆን በድምሩ 869 ቢሊዮን ዶላር ግምት ሀብይ እንዳላቸው ኦክስፋም በዛሬው ዕለት ይፋ ያደረገው መረጃ ያሳያል።አምስቱ ከፍተኛ ትርፍ በትርፍ ሆነዋል የተባሉት ባለሀብቶች የኤልቪኤምኤች ኃላፊ በርናርድ አርኖልት፣ የአማዞን ባለቤት ጄፍ ቤዞስ፣ ኢንቨስተሩ ዋረን ቡፌት፣ የኦራክል መስራች ላሪ ኤሊሰን እና የቴስላ ዋና ሥራ አስፈፃሚ ኢሎን ማስክ ናቸው።

ምንም እንኳን የአምስቱ ቢሊየኖሮች ኃብት በእጥፍ ቢጨምር 5 ቢሊዮን የዓለም ሰዎች በተመሳሳይ ጊዜ ውስጥ ከፍተኛ ድህነት ውስጥ ገብተዋል ሲል ኦክስፋም ተናግሯል። ቢሊየነሮች እ.ኤ.አ. በ2020 ከነበራቸው ሀብት የ3.3 ትሪሊየን ዶላር ብልጫ ያለው ሀብት አከማችተዋል።

እነዚሁ አምስቱ ቢሊየነሮች ከ10ሩ የአለም ታላላቅ ኩባንያዎች 7ቱን እንደሚመሩ በለንደን መቀመጫውን ያደረገው የበጎ አድራጎት ድርጅት ገልጿል።አሁን ያለው አዝማሚያ በዚሁ ከቀጠለ አለም በአስር አመታት ውስጥ የመጀመሪያ ትሪሊዮኔር ባለቤት ትሆናለች ነገር ግን ድህነት ለ229 አመታት አይጠፋም ሲል ይህው የፀረ ድህነት ቡድኑ ኦክስፋም ገልጿል።

ኦክስፋም መንግስታት የዋና ስራ አስፈፃሚዎችን ክፍያ መቆጠብ ፣የግል ሞኖፖሊ ማዳከም እና የሃብት ግብር ማስተዋወቅ አለባቸው ሲል ምክረ ሀሳብ ሰንዝሯል።በ1970ዎቹ በጀርመን መሐንዲስ እና ኢኮኖሚስት ክላውስ ሽዋብ “የባለድርሻ አካላት ካፒታሊዝምን” ከፍ ለማድረግ የተጀመረው ዓመታዊ የዓለም ኢኮኖሚ ፎረም (WEF) ከመከፈቱ በፊት ስለ እኩልነት አመታዊ ሪፖርቱን ኦክስፋም ያወጣል።

በስምኦን ደረጄ

photo_2024-01-15_10-27-58

ጥር 6፤2016 – በቦሌ አየር መንገድ በኩል የካንሰር መድኃኒቶች በሕገወጥ መንገድ ሊገባ ሲል ተያዙ

 

ግምታዊ ዋጋቸው ከ750 ሺ ብር በላይ የሚያወጡ የካንሰር መድኃኒቶች በሕገወጥ ሁኔታና መንገድ በቦሌ አየር መንገድ ተርሚናል በኩል ሊገቡ ሲል መያዙን በኢትዮጵያ ምግብና መድኃኒት ባለስልጣን የደቡብ ምስራቅ አዲስ አበባ ቅርንጫፍ ጽ/ቤት አስታውቋል።

በባለስልጣኑ የደቡብ ምስራቅ አዲስ አበባ ቅርንጫፍ ጽ/ቤት የቦሌ ተርሚናል አስተባባሪ አቶ አለምሰገድ ካብቲመር  እንደተናገሩት ታህሳስ 29 ቀን 2016 ዓ.ም በአንድ ግለሰብ የተለያዩ ሻንጣዎች ውሰጥ ተደብቀው ወደ አገር ውስጥ በህገወጥ መንገድ ሊገቡ ያሉት የካንሰር መድኃኒቶች የባለስልጣኑና  የጉምሩከ ባለሙያዎች የተቀናጀ ፍተሻ አማካኝነት በቁጥጥር ስር መዋል ችሏል፡፡

504 ብዛት ያላቸው ጥራታችው፤ ደህንነታቸውና ምንነታቸው በባለስልጣኑ ሳይረጋገጡ በኢትዮጵያ አየር መንገድ በኩል ወደ አገር ውሰጥ ሊገቡ ሲሉ የተያዙት በመርፌ የሚሰጡ የካንሰር መድኃኒቶች መሆናቸው ብስራት ሬዲዮና ቴሌቪዥን ሰምቷል። መድኃኒቶቹ በሕንድ አገር የተመረቱ ሲሆኑ ግለሰቡም ከሕንድ ወደ አዲስ አበባ በሕገወጥ መንገድ ለማስገባት ሲሞክሩ  በቁጥጥር ስር መዋሉን አቶ አለምሰገድ  ጨምረው ተናግረዋል።

እነዚህ መድኃኒቶች  በጤናው ላይ ጉዳት ያስከትሉ ይችሉ እንደነበር በመግለጽ ሕገወጥ ድርጊት በሀገር ኢኮኖሚም ላይ ቢሆን የራሱ ችግር ይፈጥራል ብለዋል፡፡

በመሆኑም ሕብረተሰቡ ቁጥጥር በሚደረግባቸው የምግብና የጤና ግብዓቶች ዙሪያ ማንኛውም ሕገወጥ ደርጊት ሲመለከት በባለስልጣኑ ነጻ የስልክ መስመር 8482 ጥቆማ እንዲሰጥ አሳስበዋል፡፡

ጥር 6፤2016 – በንፋስ ስልክ ቀለም ፋብሪካ ላይ ከባድ የእሳት አደጋ ደርሷል❗️❗️

 

በንፋስ-ስልክ ላፍቶ ክፍለ ከተማ ወረዳ 7  ንፋስ ስልክ ቀለም ፋብሪካ ላይ ከባድ የእሳት አደጋ ተነስቶ የእሳት አደጋ ሰራተኞች እሳቱን ለማጥፋት ከፍተኛ ርብርብ እያደረገ መሆኑን የአዲስ አበባ የእሳት እና ድንገተኛ አደጋ ኮሚሽን ለብስራት ሬዲዮና ቴሌቪዥን አስታውቋል።።

አደጋው ያደረሰውን ጉዳት እና በአደጋው ዙሪያ መረጃዎች እንደደረሰን ወደ እናንተ የምናቀርብ ይሆናል።

ተጨማሪ አለን…

በትግስት ላቀው

ጥር 6፤2016 – በራፋ በኩል የሚደረገውን እርዳታ የሚዘገየው በእስራኤልን ‘ግትርነት’ የተነሳ ነው ስትል ግብፅ ተናገረች

 

የግብፅ መንግስታዊ መረጃ አገልግሎት (ኤስአይኤስ) ሊቀመንበር የሆኑት ዲያ ራሽዋን እንዳሉት በራፋ እና በሌሎች የድንበር ማቋረጫዎች ወደ ጋዛ እርዳታ ሊገባ ያልቻቸው በእስራኤል ግትርነት የተነሳ ነው ሲሉ ተናግረዋል። ግጭቱ በተቀሰቀሰበት ባለፉት 100 ቀናት ውስጥ የእስራኤል ባለስልጣናት ግትርነት እና ሆን ተብሎ በሌሎች የጋዛ ሰርጥ መሻገሪያዎች ላይ የእርዳታውን ፍተሻ በማዘግየት ወደ ፍልስጤም በኩል እንዲያልፍ ባለመፍቀድ ወታደራዊ ቁጥጥር የተነሳ ነው ሲሉ አክለዋል።

በጋዛ የእስራኤል ጦርነት የጀተመረበትን 100ኛ ቀናትን በማስመልከር በመቶ ሺዎች የሚቆጠሩ ሰዎች በዓለም ዙሪያ ከፖርቹጋል እስከ ቱርክ ፣ ከዩናይትድ ኪንግደም እስከ ፓኪስታን ጎዳናዎች ላይ በመውጣት ለፍልስጥኤማውያን አጋርነታቸውን አሳይተዋል። በሌላ በኩል የአውስትራሊያ የውጭ ጉዳይ ሚኒስትር ፔኒ ዎንግ በዚህ ሳምንት ወደ ዮርዳኖስ፣ እስራኤል፣ የፍልስጤም ግዛቶች እና የተባበሩት አረብ ኤሚሬቶች እንደሚጓዙ ቢሮዋቸው በዛሬው እለት ገልጿል።

ዎንግ ከማቅናታቸው በፊት በጋዛ የዜጎች ሞትን አስመልክቶ ለቀረበላቸው ጥያቄ ለጋዜጠኞች በሰጡት ምላሽ “እንደ እስራኤል ወዳጅ አለም አቀፍ ህግ አስፈላጊ መሆኑን ማረጋገጥ እንቀጥላለን” ስትል ሚኒስትሯ ተናግራለች። በዩናይትድ ስቴትስ በሚመራው የቀይ ባህር ዘመቻ ላይ የአውስትራሊያን ሚና በተመለከተ ለተነሳላቸው ጥያቄ ሲመልሱ ዎንግ “ከጦር ዘመቻው ውጭ ብንሆንም የሰው ሃይል አቅም ውስጥ እንሳተፋለን” ሲሉ ተናግረዋል።

የዩናይትድ ስቴትስ ውጭ ጉዳይ ሚንስትር አንቶኒ ብሊንከን በበኩላቸው በጋዛ የሚገኙ ቀሪ ታጋቾች ከሃማስ እጅ እንዲወጡ ጦርነቱ የተጀመረበትን 100ኛ ቀን በማስመልከት ጥሪ አቅርበዋል። “በጋዛ ውስጥ የ100 ቀናት ምርኮ በጣም ረጅም ነው” ሲሉ ብሊንከን በኤክስ ላይ በጽሁፍ አጋተዋል። አክለውም “ስድስት አሜሪካውያንን ጨምሮ ቀሪዎቹ ታጋቾች በሙሉ ከቤተሰቦቻቸው ጋር እስኪገናኙ ድረስ ዩናይትድ ስቴትስ እረፍት አይኖራትም ብለዋል።

በስምኦን ደረጄ