👉🏼ባለፈው ስድስት ወር 18.5 ቢሊዮን ብር ታክስ መክፈሉም ተነግሯል
ኢትዮ ቴሌኮም የ2016 ዓ.ም የስድስት ወር የስራ አፈጻጸም ሪፖርቱን አቅርቧል። በስድስት ወሩ አዳዲስ አገልግሎቶችን ከማስተዋወቅ አንጻር ለመስራት አቅዶ የነበረ መሆኑን ተጠቁሟል ። በዚህም 232 አዳዲስ የሞባይል ጣቢያዎች አገልግሎት መስጠት ጀምረዋል።
በ 3G 678.2 ሺህ ፣ 4G 1.1 ሚሊዮን ፣5G 148.2 ሺህ በድምሩ 1.9 ሚሊዮን ተጨማሪ አዳዲስ የሞባይል ደንበኞችን የማስተናገድ አቅም የፈጠረ የሞባይል ኔትዎርክ የተዘረጋ መሆኑን እና በዚህም የደንበኞች ቁጥር በአጠቃላይ 81 ሚሊዮን መድረሱ የኢትዮ ቴሌኮም ዋና ስራ አስፈጻሚ የሆኑት ወይዘሪት ፍሬህይወት ታምሩ በሪፖርታቸው ገልጸዋል ።
በመፈንቅ ዓመቱ ለገጠር ቀበሌዎች የሚውል በ10 ክልሎች ለ41 ወረዳዎች ፣ 229 ሺህ ደንበኞች ማስተናገድ የሚችሉ 41 አዲስ የሞባይል ጣቢያዎች አገልግሎት መስጠት ጀምረዋል።
ኢትዮ ቴሌኮም ከፍተኛ የኦፕሬተሮች ቁጥር በመያዝ በአፍሪካ ሁለተኛ ደረጃ ላይ ይገኛል በተጨማሪም 42.9 ቢሊዮን ብር ገቢ ማግኘት ችሏል በዚህም ከተያዘው እቅድ 98 በመቶ ማሳካት መቻሉ እና 26 በመቶ እድገት ማሳየት መቻሉ ብስራት ሬዲዮ እና ቴሌቪዥን ሰምቷል ። ከዚህም ከፍተኛ ድርሻውን የሚይዘው የድምፅ አገልግሎት መሆኑም ተጠቁሟል። ባለፈው ተመሳሳይ ዓመት 9. 7 ቢሊዮን ብር የነበረው ትርፍ በዘንድሮ ዓመት 14 በመቶ እድገት አሳይቷ 11.05 ቢሊዮን ብር ትርፍ ማግኘቱም ተነግሯል።
ኢትዮ ቴሌኮም ካደረጋቸው ዋና ዋና ክፍያዎች መካከል ከፍተኛ ድርሻ የሚይዘው የታክስ መሆኑ የተገለጸ ሲሆን በዚህም 18.5 ቢሊዮን ብር ታክስ መክፈሉ የኢትዮ ቴሌኮም ዋና ስራ አስፈጻሚ ወይዘሪት ፍሬህይወት ታምሩ ገልጸዋል ።
በኤደን ሽመልስ
