photo_2024-06-17_12-06-00

ሰኔ  10፤2016 – በኮሎምቢያ አንዲት ሴት ከሰባት ጡረተኛ ወንዶች ጋር ለጥቅሟ ስትል የፍቅር ግንኙነት በመመስረቷ መነጋገሪያ ሆናለች

ሊና የተባለችው ወጣት ኮሎምቢያዊት ሴት ስትሆን ከሰባት ጡረተኞች ጋር ፍቅር የሚመስል ግንኙነት ውስጥ የገባች ሲሆን አዛውንቶቹን ለገንዘብ ፍላጎቷ ስትል ስትጠቀምባቸው እንደነበር ተሰምቷል።

በባራንኪላ ከተማ ነዋሪ የሆነችው ሊና ያልተለመደ ታሪኳ በማህበራዊ ድረ ገፅ ላይ መሰራጨቱን ተከትሎ በመላው ሀገሪቱ መነጋገሪያ ሆናለች። በራሷ ዕድሜ ክልል ከሚገኙ ከወንዶች ጋር ብዙ አሳዛኝ የፍቅር ግንኙነቶችን ካደረገች በኋላ ወጣቷ ሴት በምትኩ ጡረተኞችን ዒላማ በማድረግ የስሜት አለመረጋጋቷን ለመቅረፍ እና የገንዘብ ድጋፍ በቀላሉ ማግኘት እንደምትችል ትገነዘባለች።

ያልተሳካ የፍቅር ግንኙነቷን ወደ ተሻለ ህይወት ለመለወጥ በማሰላሰል ሊና ጎረቤቷ ከሆኑ አዛውንት ጋር ቅርርብ መፍጠር ትጀምራለች። እኚህ አዛውንት ከዚህ ቀደም ከእርሷ ጋር ለመሆን ፍላጎት እንዳላቸውም ታስታውሳለች። በተጨማሪም በእድሜ ከሚበልጧት አዛውንት ወንዶች ዘንድ በጣም ተፈላጊ እንደሆነች ተረድታለች። እናም በህዝብ ፓርኮች እና ሌሎች በብቸኝነት የሚያሳልፉ አዛውንቶች የሚዝናኑባቸው ቦታዎች የማጥመጃ መረቧ ማድረግ ጀመረች። እናም በአሁኑ ወቅት በገንዘብ ከሚደግፏት ከሰባት ጡረተኞች ጋር የጠበቀ ግንኙነት መመስረት ችላለች።

ከእድሜ እኩዮቼ ጋር የነበረኝን ግንኙነቶቼን ከመረመርኩ በኋላ ማሰብ ጀመርኩ። አዛውንቶቹ ለሚያስፈልግህ ነገር ምንም መጠየቅ የለብህም ፣ ሁሉንም ነገር ይሰጣሉ ምክንያቱም በእድሜያቸው እንደ እኔ ያለች ሴት አያገኙም። ለዛም ነው ጡረተኞችን ለመፈለግ የወሰንኩት ስትል ሊና ለኡልቲማ ሆራ ቫሌ የተሰኘ ጋዜጣ ተናግራለች። ሁልጊዜ ደስተኛ እንድሆን ያደርጉኛል በማለት አክላለች።የሊና ሰባት አረጋውያን የወንድ ጓደኞቿ ካርሎስ፣ ሲሞን፣ ጄሱስ፣ ፓብሎ፣ ማኑዌል እና ሌሎች ሁለት ስማቸውን ያልተገለፁ ወንዶች ናቸው።

ሁሉም አዛውንቶች እርስ በእርስ የሚተዋወቁ ሲሆን በወጣቷ ዘንድ ይበልጥ ለመወደድ ፉክክር ውስጥ ገብተዋል። ወንዶቹ የሊናን ወጪዎች ለመሸፈን እና የቤት ውስጥ ስራዎችን እንደ ጽዳት፣ ልብስ ማጠብ እና ምግብ ማብሰልን ጨምሮ እርሷን የመርዳት ኃላፊነት አለባቸው። በዚህም የተነሳ በእርሷ ዘንድ ይበልጥ ለመወደድ ይወዳደራሉ። ሊና ከአዛውንቶቹ ጋር የመሰረተችው ግንኙነት ከፍቅር ይልቅ እንደ ንግድ ስራ ትገልፀዋለች። በየወሩ ብዙ ገንዘብ ለሚሰጧት ለጋስ አዛውንት የበለጠ አብሮ የማሳለፍ እድል እንደምትሰጠውም ትገልጻለች።

የሊና ታሪክ በቅርቡ ከኮሎምቢያ በተጨማሪ በደቡብ አሜሪካ ሀገራት ውስጥ በስፋት ተሰራጭቷል። አንዳንዶች በእድሜ የገፉ ሰዎችን በመጠቀሟ በቁጥጥር ስር መዋል እንዳለባት አስተያየት ሰጥተዋል። ሌሎች ደግሞ ተንኮለኛ ናት የገንዘብ ፍላጎቷን ለመሙላት ስትል የሄደችበት ርቀት አስገራሚ ነው ብለዋል። ሊና ከአዛውንቶቹ ጋር ስላላት ግንኙነት እንጂ ማንም ሰው ስለሚያስበው ነገር ግድ አይሰጠኝም ስትል ትደመጣለች።

በስምኦን ደረጄ

Capture

ሰኔ  10፤2016 – በደቡብ ምዕራብ ሸዋ ዞን በደረሰ የትራፊክ አደጋ የስድስት ሰዎች ህይወት አለፈ

በ14 ሰዎች ላይ ከባድ የአካል ጉዳት ደርሷል

ሰኔ 7 ቀን 2016 ዓ.ም በደቡብ ምዕራብ ሸዋ ዞን በሰደን ሶዶ ወረዳ ሀርቡ ኩሉሌ ከተማ ልዩ ቦታዉ ላጋ ጉንጋ በተሰኘዉ ቦታ በደረሰ የትራፊክ አደጋ የስድስት ሰዎች ህይወት እንዳለፈ ብስራት ራዲዮና ቴሌቪዥን ሰምቷል።

ከቀኑ 5 ሰዓት ላይ የደረሰዉ የትራፊክ አደጋ መነሻዉን ከቱሉ ቦሎ ያደረገዉ የህዝብ ማመላለሻ አይሱዙ ተሽከርካሪ ወደ አጨበር ከተማ በመጓዝ ላይ የነበረ ሲሆን በአደጋዉ ሌሎች 14 ሰዎችም ከፍተኛ የአካል ጉዳት ደርሶባቸዋል ነዉ የተባለዉ።

ጉዳት የደረሰባቸው ሰዎች በቱሉ ቦሎ ሆስፒታል ህክምና እየተደረገላቸው ሲሆን በዚህ አደጋም ከ 1 ሚሊዮን ብር በላይ ንብረት ወድሟል ተብሏል።

ኮድ 3 49391 ኦሮ የሆነዉ ተሽከርካሪ በምን ምክኒያት አደጋዉ እንዳጋጠመዉ እየተጣራ መሆኑንም የደቡብ ምዕራብ ሸዋ ዞን ፖሊስ ያስታወቀዉ። በዚህ አደጋም የስድስት ሰዎች ህይወት ወዲያዉኑ አልፏል።

በበረከት ሞገስ

photo_2024-06-13_20-22-51

ሰኔ 6፤2016 – ለዓረፋ በዓል ወደ ወራቤ የሚያቀኑ መንገደኞች እስከ አምስት እጥፍ የደረሰ ጭማሪ የተደረገበት ታሪፍ እንዲከፍሉ መገደዳቸዉን ተናገሩ

የስልጤ ዞን ትራንስፖርት እና መንገድ ልማት መምሪያ በበኩሉ ተሽከርካሪዎቹ ወራቤ ሲደርሱ ቅጣት ይጠብቃቸዋል ብሏል

የፊታችን እሁድ ለሚከበረዉ የዓረፋ በዓል በርካታ ዜጎች ወደ ወራቤ እና ስልጦ ዞኖች የሚጓዙ መንገደኞች ከታሪፍ በላይ እንዲከፍሉ እየተጠየቁ መሆኑን ለብስራት ራዲዮና ቴሌቪዥን ተናግረዋል።

ቅሬታቸዉን ለጣቢያችን የተናገሩት አንድ መንገደኛ ከአዲስአበባ ወራቤ እስከ 1 ሺህ 500 ብር እንዲከፍሉ እየተጠየቁ መሆኑን ገልፀዋል። በህጋዊ ታሪፉ መሰረት 350 ብር ገደማ ለሚጠይቀዉ መንገድ እስከ አምስት እጥፍ ጭማሪ የታየበትን ገንዘብ እንዲከፍሉ መገደዳቸዉን ገልጸዋል። ተሽከርካሪዎቹ ከመናህሪያ ዉጪ ጫኝ መሆናቸዉንም ተጓዡ ተናግረዋል።

ብስራት የስልጤ ዞን የትራንስፖርት እና መንገድ ልማት መምሪያ አቶ ሱልጣን ራህመቶን የጠየቀ ሲሆን ፤ መምሪያዉ ጣልቃ መግባት የማይችል ቢሆንም ተሽከርካሪዎቹ ወደ ዞኑ እና ወደ ወራቤ ከተማ ሲደርሱ ግን ግጣት እንደሚጠብቃቸው ገልጸዋል። “መንገደኞች ጥቆማ መስጠት አለባቸዉ” ያሉት አቶ ሱልጣን ፤ ከታሪፍ በላይ የከፈሉትን ገንዘብ እስከማስመለስ የደረሰ አገልግሎት እንደሚያገኙ ተናግረዋል።

አንድ አሽከርካሪ ከታሪፍ በላይ ጭኖ የተገኘ እንደሆነ የ 500 ብር ቅጣት የሚጣልበት ሲሆን ይህ ደግሞ እንደክልል ደንቡ ያለዉን ክፍተት የሚያሳይ ነዉ ብለዋል። በቅርቡ ግን ክልሉ ተግባራዊ አድርጎታል ያሉት ሌላ የቅጣት ደንብ ግን ከታሪፍ በላይ ያስከፈለን አሽከርካሪ የራስ ጥቅምን በማስቀደም በሚል 2 ሺህ 500 ብር እንደሚቀጣ ደንግጓል ብለዋል። በዚህ መሰረትም አሽከርካሪዎች ፤ ተጓዦች ከታሪፍ በላይ የከፈሉትን ገንዘብ ከማስመለስ ጀምሮ ቅጣቱ እንደሚጣልባቸው አስጠንቅቀዋል።

ከፍተኛ ቁጥር ያለዉ ተሽከርካሪ ወደ ዞኑ ይገባል ተብሎ እንደሚጠበቅ የተናገሩት ሃላፊዉ የመንገድ መጨናነቅ እንዳይከሰትም በቂ  ዝግጅት አድርገናል ባይ ናቸዉ። መምሪያ የመጣለትን ጥቆማ ተከትሎ በአዲስአበባ ከሚመለከታቸው አካላት ጋር እየተነጋገረ መሆኑን አንስተዉ ከመነሻዉ ማስተካከል የሚቻልበት አማራጭ እንዳለም የስልጤ ዞን የትራንስፖርት እና መንገድ ልማት መምሪያ አቶ ሱልጣን ራህመቶ ጨምረዉ ለብስራት ራዲዮና ቴሌቪዥን ተናግረዋል።

በበረከት ሞገስ

photo_2024-06-13_20-17-41

ሰኔ 6፤2016 – እስራኤል ከ2024ቱ ኦሎምፒክ እንድትታገድ ተጠየቀ

 

በሲዊዘርላድ በመቶዎች የሚቆጠሩ ሰልፈኞች እስራኤል በ2024 የኦሎምፒክ ጨዋታዎች እንዳትሳተፍ እገዳ እንዲጣልባት ጠይቀዋል።

የፍልስጤም ባንዲራ የያዙ ተቃዋሚዎች እስራኤል ከፓሪሱ የ2024 ኦሊምፒክ እንድትታገድ የሚጠይቅ ሰላማዊ ሰልፍ በላውዛን ስዊዘርላንድ በሚገኘው የአለም አቀፍ ኦሎምፒክ ኮሚቴ ፅሕፈት ቤት ፊት ለፊት አካሂደዋል።

በፍልስጤም ግዛት ለደረሰው የንፁሃን ጥቃት ትኩረት ለማሰጠት በላውዛን በሚገኘው የአለም አቀፍ ኦሊምፒክ ኮሚቴ ፊት ለፊት ሰልፈኞች ተሰብስበው የነበረ ሲሆን፤ ኮሚቴው በእስራኤል ላይ እርምጃ እንዲወስድ ለማሳመን ሲሉ መገኘታቸው ተገልፆል።

ከሩሲያ እና ቤላሩስ የመጡ አትሌቶች በዚህ አመት ኦሎምፒክ ውድድሮች በገለልተኝነት እንዲሳተፉ ይፈቀድላቸዋል ሲል ኮሚቴው ማስታወቁ የሚታወስ ሲሆን ከሀምሌ 26 እስከ ነሐሴ 11 ባለው ጊዜ ውስጥ በሚካሄዱ ጨዋታዎች ላይ ከሁለቱም ሀገራት የሚመጡ የመንግስት ባለስልጣናት በመክፈቻው ላይ እንዲሳተፉ አይፈቀድላቸውም፣የሀገራቱን ባንዲራ ፣ አርማም ወይም ብሄራዊ መዝሙሮችም እንዲጠቀሙም አይፈቀድላቸውም።

ተቃዋሚዎቹ የእስራኤልን “ዘር ማጥፋት” በመቃወም የፍልስጤም ባንዲራዎችን እና ባነሮችን በመያዝ “እስራኤል የዘር ማጥፋት ወንጀል ፈፅማለች”፣ “ሰብአዊነት ወድቋል” እና “ፍልስጤም ነፃ ትሁን” የሚሉ መፈክሮችን አሰምተዋል። ሰላማዊ ሰልፉም ከሁለት ሰአት በላይ የፈጀ ሲሆን ያለ ፖሊስ ጣልቃ ገብነት በሰላም ተጠናቋል ተብሏል።

እ.ኤ.አ. ጥቅምት 7 2023 በሐማስ ከደረሰው ጥቃት በኋላ እስራኤል በጋዛ ላይ የምታደርገውን ጥቃት በቀጠለችበት ወቅት አለም አቀፍ ውግዘት ገጥሟታል፣የተመድ የፀጥታው ምክር ቤትም አፋጣኝ የተኩስ አቁም ስምምነት እንዲፈፀምም ጠይቋል።

በሚሊዮን ሙሴ

photo_2024-06-13_09-09-58

ሰኔ 6፤2016 – እንቁላል ጣይ ዶሮ የሰረቀው ታዳጊ የ1 አመት ከ8 ወር እስር ተቀጣ

በምእራብ ጉጂ ዞን ሀምባላ ወረዳ ቢምቱ ከተማ  02 ቀበሌ ውስጥ አንድ ዶሮ ሲሰርቅ የተያዘው ግለሰብ ላይ የእስራት ቅጣት መወሰኑን የሀምባላ ፖሊስ አስታወቀ።

የሀምባላ ወረዳ ፖሊስ ወንጀል ምርመራ ክፍል እንደገለፀው ተከሳሽ ሮቤል ሽብሩ የተባለው የ18 አመት ታዳጊ ወጣት ሰኔ 3 ቀን 2016አ.ም ከቀኑ 11 ሰዓት ላይ የአንድ ግለሰብን እንቁላል የምትጥል ዶሮ ሰርቆ በመውሰድ ሲሮጥ እጅ ከፍንጅ መያዙ ተገልጿል።

ግለሰቡ በፖሊስ የምርመራ መዝገብ በአስቸኳይ የተጣራበት ሲሆን የምርመራዉም መዝገብ ለአቃቢ ህግ ተልኳል።

አቃቢ ህግም ወድያውኑ ክስ መስርቶበት በአስቸኳይ ችሎት ውሳኔ እንዲሰጠው በመጠየቁ እንቁላል ጣይ ዶሮ የሰረቀው ታዳጊ ሮቤል ሽብሩ ሙሉ ለሙሉ ጥፋተኛ ሆኖ በመገኘቱ በ1 አመት ከ8 ወር እስራት እንዲቀጣ  የሀምባላ ወረዳ ፍርድ ቤት ውሳኔ ማስተላለፉን የሀምባላ ወረዳ ፖሊስ ወንጀል ምርመራ ክፍል ለብስራት ራዲዮና ቴሌቪዥን የላከው መረጃ ያመላክታል።

S117352748_g

ሰኔ 4፤2016 – ኤርትራ በሌሊት ብቻ የሚሰራ የኢንተርኔት አገልግሎት መስጠት መጀመሯ ተሰማ

የሙሉ ሌሊት ኢንተርኔት ተጠቃሚዎች እስከ 105 ዶላር ድረስ መክፈል ይጠበቅባቸዋል ተብሏል

ኤርትረ በትናንትናው እለት የሌሊት ኢንተርኔት አገልግሎት መስጠት መጀመሯን ብስራት ራዲዮና ቴሌቪዥን ሰምቷል።

ኤርትራ በሌሊት ብቻ ይሰጣል ባለችዉ የኢንተርኔት አገልግሎት እጅግ ዉድ ሊሰኝ እንደሚችል የኢንተርኔት እና የኮምፒውተር ባለሙያ ለብስራት ራዲዮና ቴሌቪዥን ተናግረዋል። በሰከንድ 512 ኪሎ ባይት ድረስ አገልግሎት ይሰጣል የተባለዉ ኢንተርኔት በቤት ስልክ መስመር የሚመጣ ሲሆን ተጠቃሚዎች ወደ ሞባይል እና ኮምፒውተሮቻቸዉ ማገናኘት እና መጠቀም ይችላሉ ተብሏል።

ኤርትራ በትናንትናው እለት ሌሊቱን ያስጀመረችዉ የኢንተርኔት አገልግሎት ባለሙያዎች ገለጻ ዘንድ ቀርፋፋ ነዉ የተሰኘዉን ነዉ።

ሁለት አይነት የኢንተርኔት ማስተላለፊያ መስመሮች ያሉ ሲሆን ኤዲኤስኤል (ADSL) በሲርናል ኢንተርኔት የሚደርስበት ሲሆን ቀርፋፋ የኢንተርኔት አገልግሎት የሚሰጥበትም ነዉ። በአንጻሩ በፋይበር የሚተላለፈዉ ኢንተርኔት በብርሃን አጋዥነት አገልግሎት የሚሰጥበት ሲሆን እጅግ ፈጣኑም እንደሆነ ባለሙያዉ ገልጸዋል።

ታድያ ኤርትራ አስጀመረችዉ የተባለዉ የኢንተርኔት አገልግሎት ኤዲኤስኤል (ADSL) የተሰኘዉን ነዉ። ይህ አሁንም በኢትዮጵያ አገልግሎት እየሰጠ ቢሆንም ቀርፋፋዉ አገልግሎት መሆኑን ባለሙያዉ ገልጸዋል።

ከሌሊቱ 4 ሰዓት እስከ ንጋት 12 ሰዓት ድረስ ከ 512 እስከ 1 ሜጋባይት ድረስ በሰከንድ ኢንተርኔት የሚያስጠቅነዉን አገልግሎት ለማግኘት ኤርትራውያን 1575 ናቅፋህ ወይንም 105 የአሜሪካ ዶላር መክፈል አለባቸው ተብሏል።

የተለያዩ አገልግሎቶች ይሰጣሉ የተባለ ሲሆን ተጠቃሚዎች እስከ 10 ጊጋ ባይት ድረስ የሆነና ፈጣን የኢንተርኔት አገልግሎትን ማግኘት ካሻቸዉ ደግሞ 4200 ናቅፋህ ወይንም 280 የአሜሪካ ዶላር ከፍያ መፈጸም እንዳለባቸው ብስራት ራዲዮና ቴሌቪዥን ከተሰራጨው ማስታወቂያ ላይ መታዘብ ችሏል።

በበረከት ሞገስ

photo_2024-06-11_12-09-30

ሰኔ 4፤2016 – የማላዊው ፕሬዝዳንት የሀገሪቱን ምክትልፕሬዝዳንት ይዞ የጠፋውን አውሮፕላን ለማግኘት ድጋፍ ጠየቁ

የማላዊ ፕሬዝዳንት ላዛሩስ ቻክዌራ ሰኞ እለት ምክትል ፕሬዝዳንት ሳሎስ ቺሊማን እና ዘጠኝ ሌሎች ሰዎችን ይዞ የተሰወረዉን ወታደራዊ አውሮፕላን ለማግኘት መንግስታቸው የሀገሪቱን ጎረቤቶች እና የልማት አጋሮችን እገዛ እንዲያደርጉ ጠይቀዋል፡፡

ፕሬዚደንት ቻኩዌራ ስለጠፋው አውሮፕላን መረጃ ለማግኘት መንግስታቸው የአሜሪካን፣ እስራኤልን፣ ኖርዌይን እና የእንግሊዝን መንግስታትን ማነጋገሩን ተናግረዋል።እንደ ፕሬዝዳንቱ ገለፃ የልማት አጋሮች ልዩ ቴክኖሎጂዎችን በመጠቀም “አውሮፕላኑን በቶሎ የማግኘት አቅማችንን የሚያጎለብት” ድጋፍን በተለያዩ መንገዶች ሰጥተዋል ሲሉ ተደምጠዋል፡፡“ይህ በጣም አሳዛኝ ሁኔታ እንደሆነ አውቃለሁ። ሁላችንም እንደምንፈራ እና እንደሚያሳስበን እረዳለሁ። እኔም ያሳስበኛል።

ነገር ግን ይህ አዉሮፕላን ለማግኘት ምንም አይነት ሃብት እንደማልቆጥብ ላረጋግጥላችሁ እወዳለሁ እና በህይወት የተረፉ ሰዎችን እንደምናገኝ ተስፋ አደርጋለሁ ሲሉ ተደምጠዋል፡፡ምክትል ፕሬዝዳንቱን ያሳፈረዉ አዉሮፕላን ሰኞ እለት ከሀገሪቱ ዋና ከተማ ሊሎንግዌ ተነስቶ ወደ ሰሜናዊቷ የሀገሪቱ ከተማ ምዙዙ በማምራት ላይ የነበረ ሲሆን የሀገሪቱ የቀድሞ የፍትህ ሚኒስትር እና ጠቅላይ አቃቤ ህግ ራልፍ ካሳምባራ የቀብር ስነስርዓት ላይ ለመታደም ዉጥን ነበራቸዉ፡፡

ከምክትል ፕሬዝዳንቱ በተጨማሪ በአውሮፕላኑ ውስጥ በርካታ የፓርቲያቸው ባለሥልጣናት ነበሩ።ምክትል ፕሬዝዳንቱን የያዘው አውሮፕላን መጥፋት በአገሪቱ መከላከያ ሠራዊት አዛዥ ከተነገራቸው በኋላ የማላዊው ፕሬዝዳንት ላዛረስ ቻክዌራ ወደ በውጭ ሊያደርጉት የነበረውን ጉዟቸውን ሰርዘዋል። የፕሬዝዳንቱ ጽህፈት ቤት ባወጣው መግለጫ “የተረጋገጡ መረጃዎች በተገኙ ጊዜ ለሕዝቡ ይፋ ይደረጋል” ብሏል።የአገሪቱ ጦር አዛዥ ጄኔራል ቫለንቲኖ ፊሪ ለፕሬዝዳንቱ ክስተቱን ባሳወቁበት ጊዜ ለአውሮፕላኑ መሰወር ምክንያቱ ምን እንደሆነ እንዳልታወቀ ተናግረዋል።

ምክትል ፕሬዝዳንቱ ወደ ፖለቲካው ዓለም ከመግባታቸው በፊት ዩኒሊቨር እና ኮካኮላን በመሳሰሉ ዓለም አቀፍ ኩባንያዎች ውስጥ በከፍተኛ የመሪነት ቦታ ላይ ሠርተዋል።ባለትዳር እና የሁለት ልጆች አባት የሆኑት የ51 ዓመቱ ምክትል ፕሬዝዳንት ቺሊማ ደቡባዊ አፍሪካዊቷ አገር ማላዊ ምክትል ፕሬዝዳንት በመሆን ከአውሮፓውያኑ 2014 ጀምሮ እያገለገሉ ነው።

በስምኦን ደረጄ

gggggggggggggg

ሰኔ 3፤2016 – በግድያ ወንጀል ተከሶ የፍርድ ቤት ውሳኔን ያገኘ ታራሚ የማረሚያ ቤት ፖሊስ የደንብ ልብስ አልብሰው ያስመለጡ የፖሊስ አባላት በእስራት ተቀጡ

በባሌ ዞን ደሎ መና ወረዳ መና 02 ቀበሌ ውስጥ ከሚገኘው ማረሚያ ቤት አስተዳደር በግድያ ወንጀል ተከሶ ውሳኔን ያገኘን ታራሚ የማረሚያ ቤት ፖሊስ የደንብ ልብስ በማልበስ ከማረሚያ ቤት እንዲወጣ ያደረጉ ሁለት የማረሚያ ቤት አባላት በእስራት መቀጣታቸውን የደሎ መና ወረዳ ፖሊስ አስታወቀ።

የደሎ መና ፖሊስ መምሪያ የወንጀል ምርመራ ክፍል ሀላፊ ም/ኢንስፔክተር ጫላ ተክሉ ለብስራት ሬዲዮና ቴሌቭዥን እንደገለፁት 1ኛ ተከሳሽ ም/ሳጅን ሰኚ ኑራ፣ 2ኛ ተከሳሽ ሳጅን ቃልኪዳን ሙልጌታ መሆናቸውን ገልፀዋል።

የደሎ መና ማረሚያ ቤት አስተዳደር የፖሊስ አባላት የሆኑት ሁለቱ ተከሳሾች የተጣለባቸውን የሞያ ግዴታና ሀላፊነት ወደ ጎን በመተው የካቲት 20 ቀን 2016 ዓ.ም ከቀኑ 6:00 ሰዓት ላይ በፍርድ ቤት ውሳኔ ያገኘው የማረሚያ ቤት አባላት የደንብ ልብስ በማልበስ ከማረሚያ ቤት እንዲወጣ ማድረጋቸውን ተናግረዋል።

ሁለቱ የማረሚያ ቤት የፖሊስ አባላት በግድያ ወንጀል ተከሶ ፍርድ ቤት የ21 ዓመት እስራት ከተፈረደበት ታራሚ አበበ አልዩን 47ሺ ብር በመቀበል በማረሚያ ቤቱ ሶስተኛ የጥበቃ ክፍል እንዲወጣ ማድረጋቸውን በማስረጃ መረጋገጡን ገልፀዋል።

ታራሚው በፈፀመው የግድያ ወንጀል ጥቅምት 2 ቀን 2016 ዓ.ም ተመዝግቦ የገባ ሲሆን በ4 ወሩ ሁለቱ የማረሚያ ቤት ፖሊሶች የማረሚያ ቤት አባላት የደንብ ልብስ አልብሰው እንዳስመለጡት ታውቋል።

የደሎ መና  ማረሚያ ቤት ፅ/ቤት የተፈፀመውን ድርጊት በምርመራ እና በክትትል ካረጋገጠ በኃላ በሁለቱ የማረሚያ ቤት የፖሊስ አባላቶች ላይ የወንጀል ምርመራ እንዲካሄድ ለደሎ መና ወረዳ ፖሊስ አስተላልፏል።

የደሎ መና ፖሊስ በሁለቱ የማረሚያ ቤት የፖሊስ አባላት ላይ የምርመራ መዝገብ አጠናቆ ለዓቃቢህግ ልኳል።አቃቢ ህግም የተሰጣቸውን የስራ ግዴታና ሀላፊነት ወደ ጎን በመተው ክስ የመሰረተ ሲሆን የተመሰረተውን ክስ ሲመለከት የነበረው የባሌ ዞን ከፍተኛ ፍርድ ቤት ሁለቱ የማረሚያ ቤት የፖሊስ አባላት የፈፀሙትን ወንጀል በዓቃቢ ህግ ሙሉ በሙሉ አረጋግጧል።

በዚህም 1ኛ ተከሳሽ ም/ሳጅን ሰኚ ኑራ በ3 ዓመት እስራት እና በ20ሺ ብር የገንዘብ መቀጮ እንዲቀጣ የተወሰነበት ሲሆን 2ኛ ተከሳሽ ሳጅን ቃልኪዳን ሙልጌታ ደግሞ በ1ዓመት እስራት እና በ3000ሺ ብር መቀጮ እንዲቀጣ ውሳኔ መተታላለፉን ግንቦት 30 2016 ዓ.ም በዋለው ችሎት ም/ኢንስፔክተር ጫላ ተክሉ ጨምረው ለብስራት ሬዲዮና ቴሌቪዥን ተናግረዋል።

በምህረት ታደሰ

ሰኔ 3፤2016 – የ7 ዓመቷን ታዳጊ አስገድዶ የደፈረው ግለሰብ በእስራት ተቀጣ

በባሌ ዞን ጎሮ ወረደ ወልተኢ ቀበሌ ውስጥ የ7 ዓመቷን ታዳጊ ልጅ አታሎ በመውሰድ በጫካ ውስጥ የአስገድዶ መድፈር ጥቃት የፈፀመው ግለሰብ በእስራት መቀጣቱን የጎሮ ወረዳ ፖሊስ ፅ/ቤት አስታወቀ።የጎሮ ወረደ ፖሊስ ፅ/ቤት የወንጀል ምርመራ ክፍል ሀላፊ ም/ኢንስፔክተር ፈቲሀ አህመድ ለብስራት ሬዲዮና ቴሌቭዥን እንደገለፁት አዳነ ሽመልስ የተባለው ግለሰብ መጋቢት 30 2016 ዓ.ም ከቀኑ 7 ሰዓት ላይ ወንጀሉን እንደፈፀመ ተናግረዋል።

የ7 ዓመቷ ልጅ ከህዝብ የቧንቧ ውሀ መጠቀሚያ ውሀ ለመቅደት ስትሄድ ማንም በስፍራው አለመኖሩን አይቶ ተሸክሟት ጫካ በመውሰድ አስገድዶ እንደ ደፈራት በማስረጃ መረጋገጡን ገልፀዋል።ህፃኗም ጥቃቱ እንደደረሰባት ወዲያውኑ በለቅሶ ለቤተሰቦቿ በማሳወቋ ቤተሰቦቿም ጉዳዪን ለፖሊስ በማሳወቃቸው ፖሊስ ተጎጂዋን የህክምና እርዳታ እና ምርመራ እንድታገኝ አድርጓል። እንዲሁም የድርጊቱን ፈፃሚ ከተሸሸገበት ቦታ ፈልጎ በቁጥጥር ስር ማዋሉን ገልፀዋል።

የተፈፀመውን ድርጊት በህክምና እና በሌሎች ማስረጃዎች በማጠናከር የምርመራ መዝገቡን ፖሊስ ለአቀቢ ህግ አስተላልፏል።አቃቢ ህግም ከፖሊስ የተላከውን የምርመራ መዝገብ ተመልክቶ በወንጀለኛ መቅጫ ህግ መሰረት ክስ መስርቷል።የተመሰረተውን ክስ ሲመለከት የቆየው የባሌ ዞን ከፍተኛ ፍርድ ቤት ተከሳሽ አዳነ ሽመልስ በ13 ዓመት እስራት እንዲቀጣ መወሰኑን ም/ኢንስፔክተር ፈቲሀ አህመድ ጨምረው ለብስራት ሬዲዮና ቴሌቭዥን ተናግረዋል።

በምህረት ታደሰ

photo_2024-06-10_13-42-28

ሰኔ 3፤2016 – እስራኤል ከግማሽ በላይ የሚሆኑትን የጋዛ ሕንፃዎችን እንዳወደመች የተባበሩት መንግስታት ድርጅት አስታወቀ

የተባበሩት መንግስታት የፍልስጤም ስደተኞች ኤጀንሲ እንደገለጸው ከጥቅምት 7 ጀምሮ በጋዛ ሰርጥ ከሚገኙት ሕንፃዎች ውስጥ ከግማሽ በላይ የሚሆኑት በእስራኤል ጥቃቶች ወድመዋል።የተባበሩት መንግስታት የሳተላይት ማእከል መረጃን በመጥቀስ በኤክስ ላይ ባሰፈረዉ መልዕክት “በጋዛ የደረሰው ውድመት ሊገለጽ የማይችል ነው” ሲል አስታዉቋል፡፡

“ፍርስራሹን ማጽዳት ዓመታት ይወስዳል። ከዚህ ጦርነት የስነ ልቦና ጉዳት መዳን ብዙ ጊዜ ይወስዳል” ሲል አክሎ የተኩስ ማቆም ጥሪ አቅርቧል።“ይህ መከራ ማብቃት አለበት” ሲልም አሳስቧል፡፡ በሌላ በኩል በእስራኤል መንግሥት ውስጥ ያለውን ጥልቅ ክፍፍል በግልጽ ያሳያል በተባለ ውሳኔ የአገሪቱ የጦር ካቢኔ ሚኒስትር ቤኒ ጋንትዝ የአስቸኳይ ጊዜ መንግስቱን ለቀዋል።

የሚንስትሩ ውሳኔ ከጋዛ ጦርነት በኋላ ባለው ዕቅድ ላይ ከጠቅላይ ሚኒስትር ቤንያሚን ኔታንያሁ ጋር የተፈጠረው ልዩነት ማሳያ ተደርጎ ተወስዷል።ጋንትዝ እሑድ ዕለት በቴል አቪቭ በሰጡት ጋዜጣዊ መግለጫ ላይ ስልጣናቸውን መልቀቃቸውን ሲያሳውቁ ውሳኔውን “ቀልል አልነበረም” ብለዋል።”እንደ አለመታደል ሆኖ ኔታንያሁ ወደ እውነተኛው ድል እንዳንቀርብ እየከለከለን ነው። ይህም ለቀጠለው ቀውስ ማሳያ ነው” ብለዋል።በአንዳንዶች የእስራኤል ቀጣዩ ጠቅላይ ሚንስትር ለመሆን ዕድል እንዳላች የሚነገርላቸው ጋንትዝ፤ ኔታንያሁ የምርጫ ቀን እንዲወስኑ ጠይቀዋል።

የሃመስ መሪ ሃኒዬ ለአልጀዚራ አረብኛ በሰጡት አስተያየት የእስራኤል ጦር ካቢኔ ሚኒስትር ቤኒ ጋንትዝ የስራ መልቀቂያ በተመለከተ “ጀልባው ከመስጠሟ በፊት ለመዝለል እየሞከሩ ነው” ብለዋል።የእስራኤል ባለስልጣናት የስራ መልቀቂያ ማስገባታቸዉ የእስራኤል የፖለቲካ ስርዓት “በመውደቅ” ላይ መሆኑን ያሳያል ሲሉ ሃኒዬ ተደምጠዋል።

ሃኒዬ በተጨማሪም ከኔታንያሁ ዉጪ እንደ አማራጭ የሚታዩት ጋንትዝ ከጠቅላይ ሚኒስትር ኔታንያሁ ምንም ልዩነት እንደሌላቸው ተናግረዋል።“ሁለቱም ጥፋት የሚፈልጉ ነፍሰ ገዳዮች ናቸው” ሲሉ አክለዋል፡፡

በስምኦን ደረጄ